أنا شاعر أنا زجَّال ومتغرَّب على شطوطك ومتبعتر على خطوطك ومكتوبلى أعيش رحَّال بتنسينى أوان فرحك تنادينى على جرحك ويوم حزنك أكون شيَّال أنا شاعر أقول الآه بيسكنـِّى هـَوا جـِنِّـك أنا أصرخ بدل منك وتسجنـِّى فراعينى ولا عمرك تراعينى وتنسينى...تبيعينى وليه دايما ً لأوجاعك أكون حمََّال؟! أنا شاعر أنا بحَّار ومجدافى على دربك أنا بسمه ليوم كربك أصيد الكنز وبفتحلك ألاقى الكون بيرتاح لك وشهد الحب نده نحلك وليه موجك يغرَّقنى ؟! وحراسك تفرَّقنى وليه طيرك هجر طينى ولو حضنك يغطينى أعيش عمرى أنا ليكى ألف الكون أنا بيكى أصير تاجر أنا جوَّال أنا صابر كما أيوب ومتشوَّق ودايب دوب ومن ريقك بنغزل توب وباسهرلك ورغم الشوق بنظهرلك أنا شارى ... وبتبيعى بأشعارى ينابيعى ومين غيرى أنا يدفع تمن مهرك؟! ومين غيرى أنا شايل وجع قهرك؟! ومين غيرى أنا ينفع يكون كيَّال؟! أنا شاعر بلون طيفك ويوم بردك أكون صيفك صفار الكون بلون شمسك ولو أزرق يكون نيلك ولو أسود رموش ليلك أنا أبيض كما ضيِّك ومين زيِّك؟! ولو أحمر كرات دمك أشيل همك على بابك أنا حارس جناين ورد أنا غارس ويوم عشقك أكون فارس أكون خيَّال أنا شاعر أنا زجَّال ومتغرَّب على شطوطك ومكتوبلى على خطوطك أقول موَّال
موضوع: وليه موجك يغرَّقنى ؟! 
