مفتوح على البحرى والرأى من غير خوف ولا تضليل الكلمه تشبه طلّه القنديل والصدر أوسع من "غثاء السيل"
القلب طيره بتعشق الأحلام والصوت ضمير بيفوق النِّوّام وأنا مصرى شايل روحى بالإلزام متباع ومش عارف باعونى بكام ساكت وراضى وقابل الحكّام وباحاول أشرب فرحتك م النيل
القلب باب مفتوح على الآخر باصرخ وأقف وأرفض بصوت ساخر وباقول لصوتى اثبت وموت واقف إياك يا صوتى ف مرّه تتاخر وتسيب بلدنا لحبّة البهاليل
القلب ناب حامى وكوزين عنّاب وبلدنا يوم حلو وتلاته هباب ملعون يا كدب ف حضرة الكدّاب يا جيوش بتنهش لحمى بالمُخلاب من يوم ما شفناكم يا نبت الغاب واحنا ف مهازل وف هدايد حيل
القلب ناي ساخط على الخُدّام والرأى من غير خوف ولا تطبيل أنا مصرى شايل روحى بالإلزام صايم ومرغم زى جوز الخيل والاسم من واقع بطاقتي: سخام والمهنه من واقع بطاقتي: قتيل
موضوع: "المهنة من واقع بطاقتى: قتيل" 
