بتعرَف فى الحساب يعنى؟

بتعرَف فى الحساب يعنى؟

أشرف توفيق

20/1/2013

[ندعوك للتسجيل في المنتدى أو التعريف بنفسك لمعاينة هذه الصورة]




بتعرَف فى الحساب يعنى؟

طب احسب حِسبة الأموات

فيه ناس ماتوا على الأسفلت

وناس ماتوا

ومش هتنول سبب موتهم ده مهما سأَلت

وحُطّ عليهم الأموات فى عَبَّارة

وحُطّ اللى اتقتَل علشان هَتَف فى مظاهرة بعْبَارة

وضِيف اللى اتقتَل محسور على حق اللى مات قبلُه

وضِيف اللى اتقتل من اخوه عشان فى المصلحة اتقابلوا

وناس ماتوا عشان يبقوا سلالم للى مش بيموت

غلابة ناموا كالقضبان عشان قطر الغلابة يفوت

فيه ناس ماتوا عشان فِكْرَة

وناس ماتوا عشان نتلَمّ

بقينا كلنا بنكرَه

يساوى؟

لأ.. ماتكتبهاش

عشان يمكن نِضِيف بُكرَه