والروح يا خَلق أهَمّ

كِيس دمّ ليبرالى

زعّق وقال: أعترض

القِسْمة مش عادلة

الكل واحد أكيد.. بس النَّظَر مطلوب

ده أنا جاى هنا ببَدلة

قال كِيس ضعيف حِزْبى:

اثبَتْ واقَفْ فى الصفّ

ما هو كلنا يا بن والدى مَركُونين عَ الرفّ

كِيس دمّ بيسبّح قال:

كله يصحَى.. يفُوق

أنا دمِّى ربَّانى

وعلى الله كِيس منُّكُم يلمسنى فى الصندوق

كِيس دمّ ساكِت قالولُه:

انطق معانا وقول

ردّ بغرور مُعتبَر: مش باعترِف بفْلُول

وفْ لحظة شافوا الفَضَا واتشَدّ كِيس منهُم

جِريوا عشان يخرُجوا ونِسيُوا اللى كان بينهُم

فيه حالة مستعجلة

والروح يا خَلق أهَمّ

ده برضُه مَهما حصَل

الدمّ هُوه الدمّ

أشرف توفيق