هيثم سمير يكتب: رباعيات واحد جاب آخره
[ندعوك للتسجيل في المنتدى أو التعريف بنفسك لمعاينة هذه الصورة] يا مصر يا مخضرة وسط صحارى الجفا
يا فايقة متأخرة وحــابة ضـرب القـفا
ويوم ما فوقتى وقولتى ده مصيرى فى كلمتى
فوقتى متخدرة ولبسنا الخازوق بالشفا
يا مصر ياللى العلم أصبح لابنك كفن
وشايفة إن ولادك فى أرضك زى العفن
بقى كل يوم أصحى وأجرى وأنا مجنون
هو انتى ليه بتفرحى لو واحد جديد اتدفن
يا بلد حتى نيلها أصبح بلون الدم
وهان عليك يا بلد على الصبح نشرب سم
بعد ما كان الصبح بالضحك بينور
حتى الضحكة والنكتة صبحت تشيل الهم
على فين تروحى بينا يا تايهة ع الميناء
وكشف الضحايا اتملى بكل أسامينا
أمانة عليكى تخفى وكفاية أوى علينا
مش كل يوم هنعزى فى محمد وراه مينا
بعد ما كنت بقول ده أنا مصرى رافع
راسى
قلبك يا مصر الطيب صبح علينا قاسى
بقى حلم السفر أكتر من حلم أنى أعيش
ويوم ما اسيبك واغور تقولى لجميلك أنا ناسى
موضوع: رباعيات واحد جاب آخره 
