سألت القطر مالك إيه اللى جرى إيه اللى حولك من مواصله لمقبره ليه الناس بقت كل ما تركبك يا تنزل ميته يا تنزل متعوره ده أنت كنت أكتر مواصله أمان بتركبها الناس ف مصر من زمان ده انت رابط محافظات مصر ببعضها زى ما رابط المترو المرج بحلوان ده غير إنك كنت بتمشى سريع ونضيف من جوه ومن بره بديع أما النهارده من جوه متبهدل ومن بره شكلك أصبح فظيع رد عليّا القطر وقالى ليك حق تستغرب م اللى حصل لى لكن أنا مش مستغرب لأنى عارف سبب اللى للحال ده وصلّنى ياباشا ما افتكرش إن اتعملى صيانه من أيام سيادتك ما كنت ف حضانه ده أنا بقالى سنين بنقل ف الناس وأنا أكتر من نص عربياتى خربانه ماشوفتش مسؤول عنده أمانه فكّر يطورنى لاجل الناس الغلبانه وسنين بتفوت وناس م الإهمال بتموت والمسؤولين كأن مالهومش ديانه ياباشا صدقنى أنا زيك زهقت ومن الإهمال فاض بيّا خلاص وطهقت وإياك تكون فاكر المسئولين هيحسوا ويطورونى ولا هيطورونى حتى لو أنا الحديد نطقت
موضوع: حوار مع قطار 
