عالم الإنسان - الجزء الأول

فاكرة كتاب الأحياء، فاكرة الجزء اللى كنا بناخده عن الانتخاب الطبيعى. فاكرة عبارة «البقاء للأنسب»،

فاكرة السؤال عن طول رقبة الزرافة. عارفة لما بنقول فى حياتنا العادية القطط والأسود والنمور من فصيلة القطط، والكلاب

والذئاب والثعالب من فصيلة الكلبيات. دا جزء أساسى من نظرية التطور. من محاولة الإنسان إنه يفسر الكون من حواليه.

من محاولة الإنسان إنه يفهم علاقة المخلوقات ببعضها. ويقسمها لعائلات، وفصايل – «أصول مشتركة».

ليه باقول كده قبل ما ابتدى؟ علشان دى أهم حاجة عايز أقولها من كل السلسلة عن التطور. ماتخليش حد يخدعك

ويخوّفك من العلم. ماتخليش حد يمسك فى حتة صغيرة، أو جملة مبتسرة لا أساس لها من الصحة، ويحول تشارلز دارون إلى شيطان.

لأنك بتستخدمى ٩٠٪ من المعلومات اللى وفرتها نظرية التطور فى حياتك اليومية، ومغروسة فى وعيك الحديث،

يمكن من غير ما تاخدى بالك. ولو تشارلز دارون يستحق مننا أى حاجة فهو يستحق مننا نشكره.

الإنسانة من أول التاريخ بتحاول تفهم هى إيه؟ وعلاقتها إيه بالطبيعة اللى حواليها.

أقدم محاولة متسجلة عندنا هى محاولة أفلاطون وأرسطو قبل نحو ٦٠٠ سنة من الميلاد.

همّا الاتنين كان رأيهم إن الكون «اللى يعرفوه» كله، بما فيه الإنسان، جزء من منظومة واحدة. بعدهم كان فيه فيلسوف رومانى اسمه لوكريتياس،

ودا كان عايش فى القرن السابق لميلاد المسيح، لوكريتياس كان رأيه إن جدود الإنسان ماكانوش زى الإنسان المعاصر،

إنما كانوا عايشين عيشة شبيهة بعيشة الحيوانات، عايشين فى الكهوف وماعندهمش أدوات، ولا عندهم لغة.

الفلاسفة الإغريق والرومان بوجه عام كانوا بيعتبروا إن الأدوات و«اختراع» النار، واللغة، كلها كانت نقلات مهمة جدا فى حياة الإنسان.

نقدر نقول إن كان عندهم فكرة قريبة من فكرة التطور، ولكن ليس التطور فى الشكل والتشريح، إنما التطور السلوكى،

والذهنى والمعرفى. دول كلهم عاشوا فى وقت ماكانش الدين الإبراهيمى ليه تأثير على الحياة الثقافية فى العالم. اليهودية

كانت مقتصرة على مجموعة من القبائل الرعوية الصغيرة اللى عملت دويلة صغيرة حياتها قصيرة.

فى القرون التالية، مع انتشار المسيحية، حل الإيمان الدينى محل التفكير العقلى المجرد. أصبحت الكتب المقدسة

هى المصدر الرئيسى لمعرفة تاريخ الإنسان. قعد الوضع فى أوروبا على هذا الشكل لغاية ما العرب انهزموا من إسبانيا.

ساعتها رجعت أوروبا تكتشف التراث الفلسفى الإغريقى اللى كانت أوروبا المسيحية أهملته تماما. والكتب الفلسفية الإغريقية

ابتدت تترجم من العربية إلى اللاتينية. المُنظِّر الدينى الإيطالى توماس الإقوينى بدأ يدخل شوية من الفلسفة الإغريقية فى تفسيره للكتاب للمقدس.

الكلام دا كان فى القرن الـ١٣. ودى كانت خطوة أولى فى طريق التخلص من «الدوجما» بخصوص قصة الإنسان على الأرض.

الدوجما معناها الاعتقاد الثابت غير القابل للمناقشة خصوصا لما يكون فيه أكثر من وجهة نظر فى الموضوع.

الخطوة التانية المهمة كانت بعد كده بحوالى ٣٠٠ سنة، بالتحديد لما علم التشريح اتحول لأول مرة إلى علم حقيقى.

كان فيه طالب طب هولندى اسمه أندرياس فسالياس أخد باله من تناقض بين اللى أستاذه بيقراه من الكتاب،

وبين اللى هو شايفه فى الجثة اللى بتتشرح قدامه. ممكن تكون الاختلافات بسيطة. لكنها كانت بالنسبة له مهمة.

والطالب دا قرر إنه هينسى المكتوب فى الكتب المتاحة، وهيكتب بنفسه كتاب تشريح دقيق.

الطالب دا هو مؤسس علم التشريح الحديث بكتابه اللى صدر عام ١٥٤٠ واللى عنوانه «قماشة الجسم الإنسانى» Fabric of the Human Body.

من الآن فصاعدا هيكون عندنا وصف دقيق لجسم الإنسان، لشكل عظامه، لحجم جمجمته، وشكل العضم فى الجمجمة.

شكل صوابع الإيدين والعضم اللى بيكونها. شكل عظام الساق ونسب أطوالها، وهكذا.

وهنفهم العلاقة بين الشكل وبين الوظيفة.. ماتنسيش حاجة، كل المعلومات دى هتتوفر لدينا عن الإنسان المعاصر.

ماكانش عندنا أى معلومات عن الإنسان من العصور القديمة. أكيد إنك اتوقعتى الخطوة التالية المهمة هتكون إيه.



يتبع أسفل

من الأسئلة العويصة اللى شغلت الإنسان العاقل، سؤال التاريخ. مين هم أجداده؟ وقد إيه عاشوا على الأرض؟

السؤال دا كان شاغل أوروبا فى بدايات عصر النهضة. سنة ١٦٥٠ الأسقف جيمس أشر أعلن نتيجة حساباته،

وقال بالتحديد إن الخلق حصل سنة ٤٠٠٤ قبل الميلاد. فيه مُحاضر فى علوم الدين فى جامعة كامبريدج، اسمه جون لايتفوت،

كان أدق شوية، قال إن الخلق حصل الساعة ٩ صباحا، يوم ٢٣ أكتوبر من السنة المذكورة.

طبعا أنتِ ممكن تضحكى على الكلام دا دلوقتى، لكن دا كان الرأى المعتمد وقتها. ودى مش عهود سحيقة ولا عهود ظلام.

الرأى دا كان قبل كام سنة بس من إعلان إسحق نيوتن عن قوانين الجاذبية، وكان بعد ٣ عقود تقريبا

من نشر فرانسيس بيكون صياغته لـ«المنهج العلمى فى التفكير». اسألى حواليكى وشوفى الناس هتقولك إيه.

لما ماكانش فيه معلومات علمية دى كانت أفضل إجابة متوفرة.

كلمة «عُمر» تاخد مخنا على طول إلى علم الـ«جيولوجيا». جيو يعنى أرض، جيولوجى ببساطة علم الأرض.

بعد علم التشريح اللى اتكلمنا عنه امبارح. علم الجيولوجيا هو التانى اللى عمل نقلة فى طريقة تفكير الإنسان

فى نفسه وفى حياته على الأرض. على فكرة، الحفريات طول عمرها بتتلاقى، من أيام الإغريق والرومان. بس كانوا بيعثروا عليها بالصدفة،

وكانوا على طول بيعتبروا إنها الحيوانات الأسطورية المذكورة فى الأساطير الإغريقية. لكن علم الجيولوجيا الحديث

تطور مع الثورة الصناعية. طبعا واضح ليه. لأن الإنسان احتاج يعمل حُفر عميقة

علشان يشق ترع أو يحط أساسات لسكك حديد، وعلشان المناجم بتاعة الفحم اللى الإنسان احتاجه لتوليد الطاقة.

عن طريق الملاحظة الأولية، الجيولوجيون الهواة قدروا يكوِّنوا فكرة بسيطة عن وجود طبقات فى الأرض. ومهدوا لعالم عظيم

بالنسبة إلى علم الجيولوجيا بصورته الحديثة، هو «تشارلز ليل»، اللى نشر سنة ١٨٣٠ كتاب «مبادئ الجيولوجيا»

وفيه وضح فكرة -بالنسبة لنا دلوقتى بسيطة وقديمة- إن طبقات الأرض بتتكون من قديم الأزل بنفس الطريقة اللى لسه بتتكون بيها حاليا،

طبقة فوق طبقة. تشارلز ليل كان صديقا مقربا لعالم آخر عمل نقلة نوعية فى موضوع تاريخ الإنسان على الأرض.. عالم اسمه «تشارلز دارون».

الأفكار اللى رسخها تشارلز ليل زى ما قلت أفكار بسيطة بالنسبة لنا دلوقتى. الفكرة الأولى إننا لو قطعنا الأرض

زى ما بنقطع حتة جاتوه. الجزء الأعمق فيها بيكون الأقدم، وبالتالى، وجود أى حفرية فى جزء أعمق من الأرض

معناه أنها حفرية أقدم. طب والكلام دا يزعل حد؟ تصدقى أيوه. يزعل رجال الدين يا ستى. لأنهم لقوا حفريات

بشر على أعماق أكثر بكثير من الـ٦ آلاف سنة اللى كانوا مقتنعين بيها وقتها، وبيقولوا إنها كلام مقدس. خلى بالك!!

النقطة التانية إنهم لقوا حفريات لكائنات منقرضة، موجودة فى نفس الطبقة مع كائنات لسه عايشة. طيب ودا يزعل حد؟

أيوه. يزعل نفس الناس اللى حاشرين مناخيرهم فى كل حاجة وبيدعوا إن رأيهم دا رأى خالق الكون، العارف بكل أسراره. ليه؟

لأنه بيتحدى فكرة الطوفان اللى قضى على البشرية فى وقت معين. ودى كانت الفكرة السائدة لتفسير وجود حفريات،

بعد ما اختفت فكرة الرومان والإغريق إن دى الحيوانات الأسطورية. السؤال هنا كان: إشمعنى الطوفان قضى على الحيوان

دا وماقضاش على الحيوان التانى؟ لا بد من تفسير مختلف للموضوع. السؤال دا بالذات، خلى بالك، السؤال دا

بالذات اللى مهد لفكرة التطور. إشمعنى القطة فضلت والديناصور انقرض (مثلا يعنى)؟

ما دام الإنسان بيسأل بإخلاص، برغبة فى المعرفة، معناها هيتعلم وهيعرف. الأسئلة قائد المعرفة.

السؤال خلى العلماء يبتدوا يعيدوا النظر فى معلومات أقدم شوية. ويسألوا أكتر. عن تطور اللغة، واختلاف أشكال الإنسان

باختلاف البيئات اللى عايش فيها. كمان العائدين من أماكن بعيدة ابتدوا يجيبوا أنواع مخلوقات غريبة عجيبة، لكن،

وحطى تحت لكن دى ألف خط، فيها شبه كبير جدا فى التشريح الوظيفى (شبه مش تماثل)،

وفى الدور الطبيعى، مع نباتات معروفة فى أوروبا مثلا.

لما أوضتك تتزحم بالحاجات بالشكل دا، «المفروض» تعملى إيه؟ المفروض ترتبيها (عملت كده مرة وأنا صغير).

دا بالظبط اللى حصل فى عالم الأحياء. وكانت خطوة عظيمة عظيمة عظيمة إلى الأمام.



[ندعوك للتسجيل في المنتدى أو التعريف بنفسك لمعاينة هذه الصورة]