"فى الميدان الواد معاذ" قصيدة لمحمد عمر

فى الميدان الواد معاذ

إللى ابوه صمم يجيبه

و بكرامة واعتزاز

العلم رافعه فى إيده .


بحسده وبقول يا حظه

إتولد مع جيل جديد


جيل ما يستحملش ظلمه

جيل هيتربى عنيد .


جيل ما يعرفش يساوم

ع الكرامة والعدالة

جيل هيتربى يقاوم

العمالة والندالة .


بُصِّلى أنا عايز اقولَّك

كلمة حلوة اسمعها منى

حتى رغم صُغرسنَّك

إنت بالتأكيد فاهمنى .



إوعى تنسى يوم فى عمرك

إللى ابوك جابك عشانه

إنت جيت هنا لَجل وطنك

يعلى ويحقق مكانه .


إوعى يا ابنى يوم تصدق

إن هنا فى بلطجية

إللى هنا أشرف وأصدق

من كتير خانو القضية .


إنت مش مضطر يا ابنى

تتظلم يوم زى والدك

بس إوعى يوم توطى

و اوعى تتهاون فى حقك .


إنت مش مضطر تلعن

الوطن إللى انت منّه

خلَّيه انت يبقى أحسن

ليك وللى يدافعو عنّه .


مصر خيراتها كتير

و انت من حقك تنولها

ليه تعيش وتموت فقير

وانت شايف مين واكلها ؟


بكره ييجى اليوم ويرحل

إللى زيى وزى ابوك

إوعى تنسى إوعى تهمل

للميدان كانو ليه جابوك.