الحكاية يا ناس عجبْ فين الشرف ؟! فين الرجولة ؟! فين المبادئ والأدب ؟! فين الضمير فين الأمان ؟! دا العيال ماشية بسلاسل واللبان وع الشواطئ فى النوادى كله عادى الحرام يظهر يبان امشى ع الكورنيش ف زحمة دا الهدوم كاشفاها لحمة واللى شفاف و اللى ضيِّق واللى ماشيه كمان تزيِّق والشباب شكله جنان مين هيَّه سوسو ومين رجب؟! الحكاية يا ناس عجبْ فين الرجولة والشهامة؟! ابن الأصول دا ليه علامة فين المبادئ والأدب ؟! غاب..! دا احنا عايشين جوا غاب شايفين شباب ماشية تعضعض كالكلاب مسعوره تنهش كالذئاب يشدوا من هانم غطاها ويشدوا من أختك حجاب إيه الحكاية ومين سبب دا الحكاية يا ناس عجب بنت ماشيه شمال يمين واللى لابسين عريانين والعيال مبرشمين واللى صايع واللى ضايع واللى بالع والى قالع واستريتش كمان لعين والمحزَّق والملزَّق واللى بيشيِِّش هباب فين المبادئ والأدب ؟! فين الحياء ؟! ضاع ومات راح واحتجب
الحكاية يا ناس عجبْ مين ضحية ؟! واللى جانى هوَّا مين ؟! هوَّا أب يكون أنانى راح و سافر للأمانى ساب ولاده من سنين ولاَّ أم سابت بناتها ياله ماكياجها وحاجاتها بس بتفكـَّر فى ذاتها سايبه أخلاق ويَّا دين الحكاية يا ناس عجبْ واحدة ماشية فى الشوارع عارضه أزياء بالكوارع واللى يتحرَّش ببت واللى بيشدشد فى ست واللى بيعاكس فى نت أخلاقنا تييت وتوت وتيت دا الحكاية بقت عذاب والضمير أصبح بيصرخ والقلب من حزنه ندب الحكاية يا ناس عجبْ الحكاية عايزه رابط لمَّا إعلام يبقى خابط لحم عارى وفن هابط حاجه تدوش راس جنين لمَّا فلم يكون مهين دور الرقابة يا ناس وجبْ الشباب دولا ضحية ....؟! أم جناة ؟! اللى يزرع شئ جناه دا المدارس دورها غافل والجامعه زيطة فى المحافل والقهاوى جمع حافل بانجو شيشه مهيصين ومهجيصين ومهلسين ومهنتمين دول ضحية أم جناة ؟! واللى يزرع شئ جناه واللى جانى يبقى مين ؟! مهر الزواج خلُّوه تقيل والشباب مديون ذليل والدخول يا ناس قليل والحكاية يا ناس عجب لمَّا إعلام يبقى راقى ولاَّ تعليم يبقى جيد يبنى ابنى وليه يشيِّد وأب يبقى ف بيته سيِّد يبقى أكيد هنشوف أدب يبقى أكيد هنشوف أدب
موضوع: الحكاية عجب 
