مانا زى الورد أما بيدبل
[ندعوك للتسجيل في المنتدى أو التعريف بنفسك لمعاينة هذه الصورة] طولتى الغيبة يادِى الخيبة
امتى تعودى
أنا وحدى فى البرد وْ بَنْشَفْ
هنا على عودى
لا جاوبتى عليا ولا مسحتى
دمع خدودى
.....................
ولا قُلْتى شقيان من يومُه
وبْيِجْمَع لقْمِتُه بالتيلة
مزروع فى أرض جدودي
والْهَمْ أمَّا بْيِكْتَر بَصْبُر
ما بَبِعْش الأرض ولا اتكبر
و بَصُون بالحق حدودى
..................................
فاكرانى.. قولى
و للا نسيتى
فاكرة الْحِنْية ......
و للا قسيتى
من كُتْر الهم وملايينك
سرقوا سنينك
ولا صَرَّخْتِى ولا حسيتي
ولا قُلتى حرامى وزَعَّقتى
الحقوا بيتى
ولا حتى جريتى على الجامع
تشكى لربك واتْوضيتي
وف سجدة ليل نازلة دموعك
غاسلة خدودك واستكفيتى
و أما سألتك
قلتى ولادى
رغم القسوة عايشه بهمى
و أْسْنِدْ حِيطى
وبطبطب عاللى فى المصنع
و اللى بيقلع و اللى بيزرع
جوة فى غيطى
و أستنى المحنة أما تعدي
وبقول جايز أرجع اضحك
مانا زى الورد أما بيدبل
ريحتى ف عودى
عايشه ورودي
واللى قطفنى جاى بيسأل
عمرك مرة كده حبيتى
وبرغم الحزن ببان أجمل
لا تقول كليوباترا وموناليزا
مرسومة عالحيطة
بريشة زيتى
جمالى فيه سر خلودى
وسر وجودي
بس خسارة سرقوا الموناليزا
وكليوباترا أهى شبعت موووت
هنفضل نستنى لإمتى
لما أموت
وللا تموتى
وللا هتيجى وف ايد بعض
و بْعِلْو الصوت
وتنادى
ارجعوا يا ولادى
طولت الغيبة يا دى الخيبة
أنا نفسى خلاص أرجع بيتى؟
أرجع بيتى ؟
آى والله .... أرجع بيتى ....
د. هانى أبوالفتوح
[ندعوك للتسجيل في المنتدى أو التعريف بنفسك لمعاينة هذه الصورة]
موضوع: مانا زى الورد أما بيدبل 
