(افتح قلبك مع د. هبة يس).. "دبور وزنّ على خراب عشه"

(افتح قلبك مع د. هبة يس).. "دبور وزنّ على خراب عشه"

[ندعوك للتسجيل في المنتدى أو التعريف بنفسك لمعاينة هذه الصورة]


أرسلت (س.ك) إلى افتح قلبك تقول:


أنا شابة عمرى 23 سنة، اتخطبت خطوبة تقليدية إلى "أخو صديقة لى، هو كان خاطب قبل كده لمدة سنتين
لكن سابوا بعض بسبب والدتها إللى كانت مش على وفاق معاه وبتعمل معاه مشاكل دايما،
وأنا كمان كنت مخطوبة قبل كده، لكن الخطوبة ماكملتش بسبب خطيبى المتحكم جدا والغيور بجنون،
من كل شىء ومن أى شىء، حتى إنه كان مسبب لى مشاكل فى شغلى بسبب غيرته.

الحمد لله خطيبى الحالى راجل كويس جدا، ومحترم، وشغله ممتاز، وأنا بحبه،
لكن مشكلته الأساسية إنه تقييييييل جدا، بشكل يجنن، لا يغير علىّ مطلقا،
يعنى مثلا أقوله أنا نازلة أقابل واحد زميلى أجيب منه حاجة، ولا يسألنى مين زميلك ده، ولا إيه هى الحاجه دى،
ولا يعرض على إنه ييجى معايا، ولا حتى يقول لى خلى بالك من نفسك، يستقبل الكلام عادى جدا
ويقول لى بمنتهى الهدوء طيب...وخلاص.

ومواقف من دى كثير، بقيت حاسة إنى فعلا ما أهموش، مش عارفة دى ثقة زيادة؟،ولا قلة حب؟، ولا عدم اهتمام؟،
ولا لأنه لسه متعلق بخطيبته الأولانية، لأنى عرفت إنه كان بيحبها قبل ما يخطبها لفترة طويلة،
وكمان اتخطبوا سنتين يعنى مش قليل، وفوق كل ده هو سابها غصب عنه بسبب والدتها،
عشان كده أنا خايفة يكون لسه بيحبها وبيفكر فيها عشان كده أنا مش فارقة معاه.

أنا بقت نفسى بتصعب عليا لما أحس إنه ممكن أى راجل فى الدنيا يخاف على أكثر من خطيبى،
بقيت أتعمد أختبره بمواقف من تأليفى وكل مرة بحس إنه بايعنى تماما، إتخنقت وصارحته بمشاعرى،
وسألته بصراحة إذا كانت خطيبته الأولانية السبب ولا إيه؟، قال لى إنه خلاص نسيها
وإنه مش فاكر لها غير المواقف الوحشة عشان كده مش عايز يفتكر الأيام دى خالص، أسمع كلامه أصدقه،
لكن أشوف أموره أستعجب، هو شخص حنين مانكرش، وبيؤكد لى دايما إنه حبنى وإنه مبسوط بيا،
لكن أنا خايفة لأنى عمرى ما كنت سعيدة فى حياتى زى ما أنا سعيدة معاه دلوقتى، خايفة يكون بيضحك على،
أو حتى بيوهم نفسه إنه بيحبنى وهى لسه فى دماغه، كل كام يوم يحصل موقف يحسسنى إنه مش معايا،
فأسأله واستحلفه بالله لو كان لسه بيحبها يقول لى، لكن إللى مجننى أكثر وأكثر
إنه بقى يرفض يرد، ويقول لى من حقك تسألى ومن حقى ما جاوبش!!.

حاولت أعرف منه حياته قبلى كان شكلها إيه، خاصة وأنى أعرف إنه كان بيعرف بنات قبل كده على سبيل الزمالة
أو الصداقة أو يمكن أكثر، لكنه دايما رده إنه هايقول لى كل اللى أنا عايزاه لكن بعد ما نبقى مع بعض فى بيتنا، طب ليه؟
،مش عايز يريحنى ليه؟، تقدرى تفسرى لى تصرفاته دى يا دكتورة؟، ويا ترى أنا المفروض أتصرف معاه إزاى؟

[ندعوك للتسجيل في المنتدى أو التعريف بنفسك لمعاينة هذه الصورة]

وإلى (س) أقول:

شوفى يا حبيبتى، هما حاجة من اثنين : إما خطيبك يكون فعلاً قفل على التجربة اللى فاتت،
ونسيها أو بيحاول ينساها بصدق، وعشان كده مش عايز يفتح معاكى كلام عنها أو عن غيرها فى الماضي،
لأنه عايز يركز على المستقبل، عليكى وعلى حياته الجاية،
فمش من العقل أبدا إنك تفضلى تصعبى مهمته، وتقاوميه، وتجيبى سيرة حاجات مالهاش لازمة.

أو إنه يكون فعلا لسه بيحبها، ممكن جداً، لأنه الإنسان معندوش زراير يدوس عليها ينسى إللى فات ببساطة كده،
لكن معنى إنه سابها وإنه خطب غيرها، يبقى الراجل عايز ينسى، عايز يبدأ صفحة جديدة،
عايز يندمج معاكى عشان تساعديه ينسى غيرك، يبقى برضه مش من الفطنة أبدا أنك إنتى بنفسك إللى كل شوية
تجيبى له فى سيرتها، وتسأليه عنها وعن مشاعره ناحيتها، فتقومى إنتى إللى تفكريه بيها، وتخليه يستحضر حبه
وذكرياته الجميلة معاها...ليه؟، ها تستفيدى إيه؟
، دا إنتى بالشكل ده بتبعدية عنك مسافات لأنك بتحطيها دايما بينكم حتى وهى مش موجودة.

عايزاكى تعرفى إن الماضى مش من حقك، الراجل مسئول عن تصرفاته أمامك من يوم ما خطبك،
لكن قبل كده لأ، ليه مصرة تقلبى فى القديم وتعرفى حاجات تزعلك وتنغص عليكى حياتك؟، طيب ده الحمد لله
إن الراجل طلع عاقل ومرضيش يحكيلك عن حاجة، لأنه فهمك وحس إنك من النوع القلوق
اللى ممكن يهد الدنيا ويبوظ المستقبل عشان ماضى لا هايقدم ولا هايأخر.

يا حبيبتى سيبى الراجل فى حاله، ساعديه على أنه يقفل أى صفحة كانت قبلك، ركزى على نفسك معاه،
افرحى معاه وفرحيه بيكي، حسسيه إن ربنا عوضه خير بيكى،
خليه يعرف إن إللى حبها زمان مش أول ولا آخر واحدة فى الدنيا،
وإنك إنتى كمان تتحبى وفيكى حاجات حلوة كثيرة، اللى بتعمليه ده، وللأسف بنات وستات غيرك كتير بيعملوه،
هاييجى على دماغك إنتى فى الآخر، وها تبعديه عنك، إما لأنك خنقتيه وحاصرتيه بالأسئلة،
أو لأنك بتفكريه باللى عايز ينساه، أو لأنك هاتقللى من نفسك فى نظره لأنه هايحس إنك مش واثقة فى نفسك كفاية،
وبتقارنى نفسك دايما بآخريات، صدقينى بلاش اللى بتعمليه ده
وإلا هاتكونى عاملة زى الدبور اللى زن على خراب عشه،
وساعتها بقى ماتزعليش لو سابك فعلا وراح لواحدة تانية واثقة من نفسها وتقدر تملأ عينه وقلبه.

أما بالنسبة لموضوع الغيرة ده، هو إنتى مش سبتى خطيبك الأولانى عشان كان غيور بزيادة؟،
يعنى مش دايما الغيرة دى حاجة كويسة ولا معيار للحب، وطالما خطيبك الحالى راجل كويس ومحترم
وحنين زى ما بتقولى، يبقى إرضى بيه واقبليه على حاله كده، حتى لو كان ده عيبه
فهو عيب هين بالنسبة لعيوب تانية كثيرة، وعشان أريحك شوفيه هو بيتعامل مع أخته أو والدته إزاى؟،
لو كان بيعاملهم بنفس الأسلوب من الثقة والهدوء، يبقى هو طبعه كده والموضوع مش قلة اهتمام بيكى،
أما لو كان بيغير عليهم أو بيعمل معاهم أكتر من اللى بيعمله معاكى، يبقى ساعتها عوديه بالتدريج إنه يهتم بيكى،
فهميه بهدوء إنك هاتحسى بحبه واهتمامه لو عمل كذا أو لو قال كذا،
جايز هو مش فى دماغه أصلا الكلام ده كله ومحتاج حد ينبهه.


[ندعوك للتسجيل في المنتدى أو التعريف بنفسك لمعاينة هذه الصورة]